2Cor 13 | MHL | STEP | Aria yo iiriw niar ikiwowa erup arem. Ne aakisa nainiw niar ikiwowa maem-ikaiyem. Yo mokomokoka niar ikiwep ekapem, naap ikok nainiw niar ikiwem nain nan ikok mua eena pina onamik nain ariman wia maakem, “Ni maa uru-urufami ikeka. Oko yo yoowa niinen,” naap nia maakem. Ne yo aakisa epasia-pa ikok opora kuisow fain nainiw nia maakiyem. Mua Maneka opora feenap maek, “Mua-ko pina oneya mua wiam arow erup naap maikuan-na, ‘Makena, o pina onak,’ aria o pina wiar ikainon.” Naapeya yo ikoka nainiw ikiwinen nain, ni mua pina onaman nain, ne ni mua papako pun, yo me nia urufap-puinen.

2 Corinthians 13

Wi sira baliwep ikowa naep opor kekanowa wiek

1 Aria yo iiriw niar ikiwowa erup arem. Ne aakisa nainiw niar ikiwowa maem-ikaiyem. Yo mokomokoka niar ikiwep ekapem, naap ikok nainiw niar ikiwem nain nan ikok mua eena pina onamik nain ariman wia maakem, “Ni maa uru-urufami ikeka. Oko yo yoowa niinen,” naap nia maakem. Ne yo aakisa epasia-pa ikok opora kuisow fain nainiw nia maakiyem. Mua Maneka opora feenap maek, “Mua-ko pina oneya mua wiam arow erup naap maikuan-na, ‘Makena, o pina onak,’ aria o pina wiar ikainon.” Naapeya yo ikoka nainiw ikiwinen nain, ni mua pina onaman nain, ne ni mua papako pun, yo me nia urufap-puinen. 3 Moram nis-ke naap efa maeman, “O Krais opora wiar aakuniyem naiya, nain ona wame ileneya amisariyen,” ni naap efa maeman. Naapeya yo ikoka yoowa niemi nia kakenamkun ni Krais kekanowa neek wiar urufowen. O kekelka me nia wuinon. 4 Makena, o iiriw kekanowa marew ikaeya nomokow moke-pa patot wariwkin umok. Ne iikirak nain Mua Maneka kekanowa-pa iikirap ikua. Ne is pun naap, o wameiya kekanowa marew ikok umemik, naap yiam maimik. Nain i Mua Maneka kekanowa-pa Krais wameiya ikok ni nia kakenowa nain uuwam-ikaimik.

5 Ni anane niena sira niam furewami kema niam pupep urufeka. Ni kekanep Yeesus Krais opora wiar opam-ikaiman-i? Ni baliwep niam fureweka. Yeesus Krais ni niamiya ikaiya, ni nain me amisareman-i? E kamenap, ni iiwawun oro-booneman-yon aa, naeya Krais me niamiya ikua. 6 Ne yo feenap nia maakiyem, is pun yia fureweka, i me oro-boonemik. 7 Ne ni pina me oneka naep Mua Maneka faremi maakimik. I kekanep opora opimik nain yia urufeka naep me nia maakimik, weetak. Ne mua papako naap yia furewimik-yon, wi oro-boonemik, naap yia maimik-yon. Naap yia maikuan-na nain pun ni kekanep sira eliwa ookeka naep i anane Mua Maneka farimik. 8 Moram i opor makena fienap sira oko-pa ikiwowa-ko me ikua, weetak. I opor makena opap ikok nain ookowa-ke ikua. 9 I kekanowa marew pun eliwa, nain ni kekaniwkin-na i kemeliyen. Naeya i anane Mua Maneka farimik, ni nia asipam-ikaeya sira baliwep akena ook-ikiwemi dubil akena ikeka naep. 10 Yo naapeya fan ikok opor unowa fain nia siisimomam. Ni parosifa efar urufap niena niam kakeneka. Mua Maneka kekanowa yiek nain nia kakenami kema nia iikirowowa-ke, me nia samorowa nain-ke. Naeya ni niam kakenap baliwep ikaiwkin yo ikiwemi yoowa me niinen.

Wi eliw ikowa opora wiek

11 Emar unowik, yo aakisa eliw ikeka nia naiyem. I dubil akena ikaiyen niam naep sira kakeniw ookam-ikeka. Ne opora eena nia maakem nain efar miimeka. Ni unowiya kema kuisow ikok eliwa ikeka. Naeya Mua Maneka ni niamiya ikainok, o eena yia kookalep kema sonom eliwa yiiya nain.

12 Ni Yeesus Krais teeria niam fiirimem-ikok-na o unuma-pa sira eliwa-pa wapena niam opaka. 13 Aria Yeesus Krais teeria fan efamiya ikemik nain ni eliwa ikeka nia naimik.

14 Yiena Maneka Yeesus Krais nia kemalep naap nia asipam-ikainok naiyem. Ne Mua Maneka naap nia kookalem-ikainok, ne Ewar Eliwa-ke teeria kuisow nia wuinok naiyem.